ಸೂಕ್ಷ್ಮವಾಗಿ ಗಮನಿಸು ನೀನೊಮ್ಮೆ ಏನಿದೆ  ಈ ಪ್ರಕೃತಿಯ ಒಳಗೆ;

 ಕಾಣುವುದು ನಿನಗೆ ಸುಕೃತಿಯ ಜೊತೆಗೆ ವಿಕೃತಿ ಅದರ ಪಾಲಿಗೆ. 

ಭಾಸ್ಕರನ  ಖರಕರ ದಹಿಸುವುದು ಧರಣಿಯ ಬಂದಾಗ ಋತು ಬೇಸಿಗೆ;

 ನಿಲ್ಲದಿರುವುದು ಈ ಸಮಯ, ಬರುವುದು ಮಳೆಗಾಲ ಮಾಡಿ   ಧರಣಿಯ ತಣ್ಣಗೆ.

ಬರಗಾಲ ಬಂದಾಗ  ಬತ್ತಿ ಹೋಗುವುದು ನದಿ, ಹರಿದುಕೊಂಡು ಹೋಗಿ ಸಣ್ಣಗೆ;   

 ಸಂತಸದಿಂದ ತುಂಬಿ ಪ್ರವಹಿಸುವುದಿಲ್ಲವೇ ಅದು, ಮಳೆ ಮತ್ತೆ ಬರಲು ಭೂಮಿಗೆ.

ಮಾಗಿಯ ಎದುರಿಸಲು ಬೋಳಾಗುವುದು ಗಿಡಮರ ಶರತ್ಕಾಲದ ವೇಳೆಗೆ ;

ಉಲ್ಲಾಸ ತೋರುತ ಚಿಗುರೊಡೆಯಲೇ  ಬೇಕವು ವಸಂತ ಆಗಮಿಸಿದಾಗ ಮೆಲ್ಲಗೆ.

ಪರಿಸರ ಬದಲಾವಣೆ ಸಂಕಷ್ಟ   ತರುವುದು ಒಮ್ಮೊಮ್ಮೆ ಪಕ್ಷಿಗಳ ಬಾಳಿಗೆ ;

ವಿಘ್ನ ಪರಿಹರಿಸಿಕೊಳ್ಳುವುದಿಲ್ಲವೇ  ಅವು ,ವಲಸೆ ಹೋಗಿ ಬೇರೆ ಊರಿಗೆ.

ಕಾಡು ಕಡೆದು ನಾಡು ಮಾಡಿ ಇರದಂತೆ ಮಾಡಿದರು ಪ್ರಾಣಿಗಳಿಗೆ ಮಾಳಿಗೆ ;

ಜೀವಿಸುತ್ತಿಲ್ಲವೇ ಅವುಗಳು ಪೂರ್ಣ ವಿರಾಮ ಇಡದೆ ತಮ್ಮ ಬಾಳಿಗೆ.

ಭೂಮಿ, ನದಿ ,ಗಿಡ, ಮರ ,ಪ್ರಾಣಿ, ಪಕ್ಷಿ ತೊಂದರೆ ಬಂದಾಗ ಯಾವುದು ಯೋಚಿಸಲಿಲ್ಲ  ಕೀಳಾಗಿ; 

ಸಕಾರಾತ್ಮಕವಾಗಿ ಇರುವವು ವಿನಹ,  ಪ್ರಾಣತ್ಯಾಗ ಮಾಡುವ ಪ್ರಶ್ನೆಯೇ ಇಲ್ಲ ಇವರ ಬಾಳಹಾದಿಗೆ.

ನೀನು ಕೂಡ ಪ್ರಕೃತಿ, ನೀನೇಕೆ ಯತ್ನಿಸುವೆ ಆತ್ಮಹತ್ಯೆಗೆ? 

ಧನಾತ್ಮಕನಾಗಿ ಜೀವಿಸು, ಇದು ನೀನು ಆ ಸೃಷ್ಟಿಕರ್ತನಿಗೆ ಕೊಡುವ ದೇಣಿಗೆ......